KAMATAYON, SIGURADONG MOABOT KANIMO. ANDAM KA NA BA?

Home My Calling

May usa ka tawo nga gustong makatrabaho sa laing nasod busa ang iyang gibuhat ningduol siya sa usa ka recruiting agency aron pag-apply. Kini nga agency lahi kay giingnan siya niini nga ang ila lamang mabuhat mao ang pagpadala kaniya sa Saudi Arabia. Kon atua na siya, bahala na siya sa iyang kinabuhi. Walay mosugat kaniya sa air port, wala pa gayod kapuy-an ug walay trabaho nga giandam alang kaniya didto. Ang mahimo lang gayud sa agency mao ang pagpalarga kaniya pagawas sa Pilipinas.

Kini ang usa ka kahimtang nga dili nato gustong buhaton o mahitabo kanato. Apan ang tinuod, kon wala ka masayod kon unsa ang mahitabo sa imong kalag kon ikaw mamatay, sama ka sa tawong moabrod apan walay siguro unsay imong dangatan didto sa laing nasod.

Sama sa mo-abroad, ang kamatayon maoy paghawa sa imong gipuy-an apan adunay kalainan kining duha. Kon mamatay ka, dili ka na makabalik sa imong gipuy-an dili pareha sa mo-abroad. Ang pag-abroad pwede nga ikansela apan ang kamatayon, dili mapugngan.

Higala, ang Biblia nagaingon:

Kinahanglan mamatay ang tagsatagsa sa makausa, ug tapos niana hukman siya sa Dios (Hebreo 9:27)

Sa gusto mo'g sa dili, moabot kanimo ang oras sa kamatayon. Mopanaw ka niining kinabuhia ug di na gayud mobalik. Moatubang ka sa Dios aron hukman. Nasayran mo ba kon unsay ihukom sa Dios kanimo? Kon wala, dako ang imong problema. Mora ka'g mag-abroad nga walay kasiguruhan kon unsay mahitabo kanimo kon atua ka na sa laing nasod.

ANG TANAN NAKASALA

Sala ang hinungdan nganong dili ka kasiguro kon unsay mahitabo sa imong kalag kon moatubang ka na sa Dios. Sumala sa Biblia:

Nakasala ang tanan ug nahilayo sa Dios (Roma 3:23).

Sumala sa kasulatan: Wala gayoy tawo nga matarong,...(Roma 3:10).

Kon moingon kita nga wala kitay sala, gilimbongan nato ang atong kaugalingon ug wala kanato ang kamatuoran (1Juan 1:8).

ANG BAYAD SA SALA

Ang sala pagabayaran sa tawo ngadto sa Dios.

Unsay bayad sa sala? Sumala sa Biblia:

Kay ang bayad sa pagpakasala mao ang kamatayon,... (Roma 6:23).

Apan ang mga talawan, ang mga mabudhion, ang mga malaw-ayon, ang mga mamumuno, ang mga makighilawason, ang mga salamangkiro, ang mga nagsimbag mga diosdios, ug ang tanang bakakon mahiagom gayod sa linaw nga kalayo ug asupre nga mao ang ikaduhang kamatayon (Gpadayag 21:8).

WALA KAY MAHIMO ARON LUWASON ANG IMONG KAUGALINGON

Kon gihunahuna nimo nga naa kay mahimo aron maluwas ka, mapakyas ka kay nagaingon ang Biblia:

..."Nan, kinsa man diay ang arang maluwas?" Si Jesus mitan-aw kanila ug miingon kanila, "Sa tawo, dili kini mahimo; apan sa Dios ang tanan mahimo." (Mat 19:25-26)

Kay kami nga tanan nangahimo nga ingon sa usa nga mahugaw, ug ang tanan namo nga pagkamatarung ingon sa usa ka saput nga nahugawan; ug kaming tanan mangalaya ingon sa usa ka dahon; ug ang among mga kasal-anan, sama sa hangin, nagapalid kanamo. (Isaias 64:6).

Kay ang naglapas bisan sa usa lamang ka sugo sa Balaod nakalapas sa tanan (Santiago 2:10).

GIHIGUGMA KA SA DIOS

Nakita sa Dios ang imong pagkawalay paglaum. Gihigugma ka Niya ug naluoy Siya kanimo mao nga Siya ang naghimo ug pamaagi aron ikaw maluwas. Kining pamaagi sa Dios ang bugtong nga pamaagi sa pagluwas kanimo, wala nay lain,

Unsa kining pamaagi sa Dios aron maluwas ka? Nagaingon ang Biblia:

Kay gihigugma pag-ayo sa Dios ang kalibotan ug tungod niini gihatag niya ang iyang bugtong anak, aron ang tanan nga motuo kaniya dili mamatay, kondili makabaton hinuon sa kinabuhing dayon (Juan 3:16).

Apan gipakita sa Dios kanato ang gidak-on sa iyang paghigugma kanato, kay sa makakasala pa kita nagpakamatay si Cristo alang kanato (Roma 5:8).

Gisamaran siya tungod sa atong mga sala, nangapangos siya tungod sa atong pagkadaotan; giantos niya ang kastigo nga maoy nakaluwas kanato, ug pinaagi sa iyang mga labod nangaayo kita (Isaiah 53:5).

Oo, si Cristo ang gisilotan ug namatay tungod sa imong mga sala. Ingon ka niana kamahal sa Dios.

KINAHANGLAN MAGDESISYON KA

Ang magbasa lamang niining mensahe dili igo. Kinahanglan magdesisyon ka.

Unsang desisyon ang kinahanglan mong buhaton? Nagaingon ang Biblia:

Nagtindog ako sa pultahan ug nagtuktok; kon may makadungog sa akong tingog ug moabli sa pultahan, mosulod ako sa iyang balay ug makigsalo kaniya, ug mokaon siya uban kanako (Gipadayag 3:20)

Hinuon, may midawat ug mituo kaniya; busa sila gihatagan niya sa katungod nga mahimong mga anak sa Dios (Juan 1:12).

Tuo sa Ginoong Jesus, ug maluwas ka lakip ang imong panimalay.(Buhat 16:31)

Oo, higala, kinahanglan ablihan mo karon ang imong kasingkasing ug dawaton si Cristo isip imong Ginoo ug Manluluwas.

"Ginoong Jesus, giila ko nga ako usa ka makasasala ug walay mahimo aron luwason ang akong kaugalingon. Pasayloa ako sa tanan kong mga kasal-anan. Giila ko nga ikaw ang bugtong anak sa Dios, namatay ka sa krus aron bayran ang akong mga sala. Nadungog ko karon ang imong tingog ug ang imong pagtuktok sa akong kasingkasing. Ako karon nagaabli sa akong kasingkasing ug dawaton ko ikaw nga akong Ginoo ug Manluluwas. Gamhi ang trono sa akong kinabuhi. Himoa ako sumala sa Imong kabubuton. Kini ang akong pag-ampo sa ngalan mo, Jesus. Amen."

Kini nga pag-ampo mao ba ang tinguha sa imong kasingkasing? Kon gusto mong pasudlon si Cristo sa imong kasingkasing, isulti mo kini sa kinasingkasing ngadto Kaniya.

Higala, kon gisulti mo kini kang Jesus sa kinasingkaasing, nagaingon usab siya kanimo:

Sultihan ko kamo: ang motuo may kinabuhing walay kataposan (Juan 6:47).

Ang akong mga karnero mamati sa akong tingog; nakaila ako kanila ug sila nagsunod kanako. Naghatag ako kanila sa kinabuhing dayon, ug dili na gayod sila mangamatay; ug walay makaagaw kanila gikan kanako (Juan 10:27-28).

...ang Dios naghatag kanato sa kinabuhing walay kataposan ug anaa sa iyang Anak kining kinabuhia. Ang midawat sa Anak may kinabuhing walay kataposan, apan ang wala modawat sa Anak sa Dios wala makabaton sa maong kinabuhi (1Juan 5:11-12).

Kay pinaagi sa pagtuo naluwas kamo tungod sa grasya sa Dios. Dili kini inyong buhat kondili gasa sa Dios. Busa walay makapasigarbo niini sanglit dili man kini bunga sa inyong mga paningkamot (Efeso 2:8-9).

Oo, higala, bisan buhi pa ka diri sa kalibotan, gipahibalo na sa Dios nga ikaw luwas na. Dili ka na angay mahadlok sa kamatayon kay nagsaad siya kanimo nga naa kay kinabuhing walay kataposan ug di ka na malaglag kon gidawat mo karon si Cristo sa imong kasingkasing isip imong Ginoo ug Manluluwas.

Kon malipayon ka karon tungod sa kaluwasan nga imong nadawat, simbaha ug pasalamati ang Ginoo. Gusto usab sa Ginoo nga mahimo kang tinun-an Niya.

Kada Dominggo 9:00 sa buntag adunay libreng pagtudlo sa Pulong sa Dios sa:

Consolacion Fundamental Christian Outreach

(Formerly Mandaue Fundamental Christian Outreach)

Purok 1, Nangka, Consolacion, Cebu

Ikaw among gidapit sa pagtambong.

Pwede pod ka nga motawag sa tel. # 4239051 o mag-text sa cel. #: 09194967314

Aduna usab kami gihatag nga mga libreng kurso alang kanimo nga makatabang sa imong pagkinabuhing Cristohanon. Among ipadala kanimo ang mga lessons kon mangayo ka kanamo. Kining tanan walay bayad.

Andam usab kami mobisita sa inyong balay kon gusto mo ug libreng pagtudlo sa Biblia kauban ang imong panimalay.

Ang Dios magapanalangin kanimo.

Arman Borja

CFCO missionary Pastor